सम्पर्कप्रमुखः

समाजे प्रतिष्ठिताः संस्कृतं पठेयुः, वदेयुः अन्यथा संस्कृतकार्यार्थं सहायकाः पोषकाः वा भवेयुः। तदा समाजे संस्कृतकार्यस्य प्रतिष्ठा, प्रभावः च सहजतया वर्धिष्यते। अतः समाजे विद्यमानानां प्रतिष्ठितानां सम्पर्कः सम्पर्कविभागस्य कार्यम् अस्ति।

प्रभाविजनानाम् आवली श्रेण्यनुगुणं सज्जीकृता भवेत्। काले काले तस्याः परिष्कारः अपि भवेत्।
सम्पर्कार्थम् अनुवर्तनाय च वृत्यनुगुणं श्रेणीप्रमुखाः अन्वेषणीयाः।
कार्यक्रमेषु सम्पर्कितानाम् आह्वानं भवेत्। प्रथमवारं मञ्चे, अनन्तरम् आसन्देषु प्रथमपङ्क्तौ ते भवेयुः।
सम्पर्कः इति काचित् कला अस्ति। सम्पर्कविभागस्य प्रशिक्षणं कार्यक्षेत्रे भवेत्। सम्पर्के ये प्रश्नाः जनैः पृष्टाः स्युः तेषां समाधानं सम्पर्कविभागस्य कार्यकर्तारः जानीयुः इति दृष्ट्या प्रशिक्षणम् आयोजनीयम्।
सम्पर्कः अधिकतया प्रादेशिकभाषया अथवा आङ्ग्लभाषया करणीयः भवति।
सम्पर्कार्थं संस्कृतभारती-कार्यपरिचयस्य पत्रकाणि, पत्राचारयोजनायाः करपत्राणि भवेयुः।
संघटनकार्यवृत्तं सज्जीकृतं भवेत् प्रतिवर्षम्।
सम्पर्कितानां जनानां विवरणम् एकत्र संगृह्य तत् प्रान्तकार्यालये रक्षणीयम्।
प्रतिवर्षं तेभ्यः संस्कृतसप्ताहसन्दर्भे शुभाशयपत्रं प्रेषणीयम्।