साहित्यप्रमुखः
समकालीनसाहित्यनिर्माणं, प्रसारः च अस्माकं कार्यविभागेषु अन्यतमः। तदर्थं प्रकाशनविभागः नियतरूपेण कार्यं करोति। प्रकाशितानां पुस्तकानां समाजस्य पुरतः उपस्थापनं, तस्य प्रचारः, विक्रयणं च व्यवस्थितरूपेण भवति चेत् एवं पुस्तकप्रकाशनेन उपयोगः। अनेन अस्माकं विचारस्य प्रसारः भवति। तदर्थं साहित्यप्रमुखाः सर्वेषु स्तरेषु अवधानं कुर्युः।
साहित्यस्य प्रसारदृष्ट्या साहित्यप्रमुखैः करणीयानि कार्याणि
- संस्कृतभारत्याः पुस्तकानां प्रदर्शनस्य आयोजनम्। तत्र पुस्तकविक्रयणस्य व्यवस्था भवेत्।
- उत्सवेषु, महाविद्यालयानां वार्षिकोत्सवेषु, पुस्तकमेलासु इत्यादिसन्दर्भेषु यत्र अधिकाः जनाः एकत्र भवन्ति तादृशेषु स्थानेषु प्रसङ्गेषु च पुस्तकप्रदर्शनं विक्रयणं च भवेत्।
- विद्यासंस्थानां सम्पर्कं कृत्वा अस्माभिः प्रकाशितानां पुस्तकानाम् आधारेण संस्कृतपाठनार्थम् अनुरोधः करणीयः।
- विभिन्नेषु पुस्तकापणेषु अपि संस्कृतभारत्याः पुस्तकानां विक्रयणं यथा भवेत् तथा प्रयासः विधेयः।
- अपेक्षानुसारं समये समये पुस्तकप्रेषणस्य योग्या व्यवस्था प्रान्तकेन्द्रेषु भवेत्।
- कार्यालयेषु पुस्तकस्थापनं प्रदर्शनं विक्रयणं च सुव्यवस्थितं स्यात्। तत्र अवधानं भवेत् साहित्यप्रमुखस्य।
- येभ्यः केन्द्रेभ्यः पुस्तकानि स्वीक्रियन्ते तेभ्यः केन्द्रेभ्यः समये समये पुस्तकानां धनदानं, विक्रीतानां पुस्तकानां गणना च व्यवस्थितं दोषरहितं च स्यात्। एतत् कार्यं साहित्यप्रमुखः साधयेत्।
- अस्माभिः प्रकाशितानां पुस्तकानां सम्भाषणसन्देश-पत्रिकायाः च पठितॄणां वाचकसम्मेलनं प्रतिपुष्टिप्राप्तिः च स्थाने स्थाने भवितुम् अर्हति।
- संस्कृतेन लेखकानाम् अनुवादकानां च वर्गस्य आयोजनं प्रशिक्षणविभागस्य सहयोगेन करणीयम्।