अभिलेखागारप्रमुखः
प्रान्तस्य संघटनसम्बद्धानि सर्वविधानि विवरणानि प्रान्तकेन्द्रे संगृहीतानि संरक्षितानि च भवेयुः। तदर्थम् अभिलेखागार-प्रमुखः अवधानं कुर्यात्।
अभिलेखागारप्रमुखेण संग्रहणीयाः अंशाः करणीयानि कार्याणि च
- प्रान्ते संस्कृतभारत्याः आरम्भकालतः कार्यं कृतवतां कार्यकर्तॄणाम् आवली। यथा – अध्यक्षः, मन्त्री, संघटनमन्त्री, प्रशिक्षणप्रमुखः इत्यादीनाम् आवली।
- प्रान्तस्तरतः खण्डस्तरपर्यन्तम् उत्तरदायित्ववतां कार्यकर्तृणाम् आवली सम्पर्कसंख्या च।
- अन्यस्मात् प्रान्तात् स्थानात् वा आगत्य प्रान्ते कार्यं कृतवतां पूर्णकालिककार्यकर्तृणां सम्पर्कसंख्यासहिता आवली।
- प्रान्ततः प्रस्थितानां पूर्णकालिककार्यकर्तॄणां सम्पर्कसंख्यासहिता आवली।
- शिबिरचालकानाम् आवली।
- अस्माकं विविधेषु आयामेषु ये पाठयन्तः सन्ति तादृशानां शिक्षकाणां सूची।
- संस्कृतकुटुम्बानाम् आवली।
- अस्माकं पद्धत्यनुगुणं विद्यालयेषु महाविद्यालयेषु च पाठयितृणां शिक्षकाणां विवरणम्।
- प्रान्तस्य कार्यवृत्तं वर्षानुगुणम्।
- प्रमुखकार्यक्रमाणां प्रान्तसम्मेलनानां च चित्रसहितं विवरणम्।
- समाजस्य प्रमुखाणां संस्कृतभारत्याः विषयकस्य वक्तव्यस्य वार्ताविवरणं ध्वनिमुद्रणानि च।
- प्रान्ते संस्कृतभारत्याः क्रमशः विकासस्य घटनाक्रमस्य विवरणं, ज्येष्ठकार्यकर्तॄणाम् अनुभवः इत्यादीनां संग्रहः।